Sa katuyoan nga mas mapahapsay pa ang dagan sa trapiko sa Cogon Market area atol sa ‘peak hours’, nagpahigayon og dry run alang sa bag-ong traffic scheme ang mga personahi sa Roads and Traffic Administration (RTA) uban sa Night Market Management Committee, Martes Enero 17, 2022.

 

Pipila ka mga pedestrian lanes ang temporaryong gisirad-an diin usa lang ang gigamit aron dili motabok sa tanang higayon ug sa bisan asa gusto sa publiko nga motabok nga usa sa nakita nga makabara sa dagan sa trapiko.

Gipadayag ni RTA Dep’t Manager Engr. Nonito Oclarit nga bisan hapsay ug luag na ang dagan sa trapiko palibot sa merkado sa Cogon apan adunay panahon nga medyo maghuot kini.

 

Nasayran nga adunay tulo ka pedestrian lanes ang dalan sa J.R. Borja atubangan sa Cogon Market diin usa kini sa nakita nga mga hinungdan nga medyo magkagubot ang dagan sa trapiko ilabina nga dili magdungan og tabok ang mga tawo.

 

Usa sa nakita nga paagi mao nga ipadungan og tabok ang mga tawo diin adunay ipahimutang nga mga traffic enforcers inabagan sa mga barangay tanod nga maoy mag-assist ug mo-control alang sa ilang hiniusang pagtabok.

Samtang gipasabot usab ni kanhi Kag. Enrico Salcedo, chairman sa Night Market Management Committee, nga kung makita nga epektibo ug maayo ang resulta sa maong dry run i-rekomenda nila kini kang Mayor Rolando `Klarex’ Uy aron mabuhatan og Executive Order alang sa hingpit nga pagpatuman. (ALR/CIO/Photos by Reynan Baylin/CIO)