Sa tinguha nga hugtanong sundon sa mga foodcart vendors ang kalimpyo sa ilang tagsa-tagsa ka puwesto, gipatawag sila sa Night Market Management Committee nga gimugna ni Mayor Rolando `Klarex’ Uy aron subling pahinumduman sa mga gabayan.

 

Mokabat 52 ka mga foodcart vendors ang mitambong sa maong tigom diin silang tanan misaad nga padayon nilang sundon ang mga gabayan nga gipatuman ilabina ang paglimpyo sa ilang mga basura ug ibutang sa insakto nga lugar alang sa pagkolekta sa mga personahi sa City Local Environment & Natural Resources (Clenro).

 

Apan nasayran nga sa 52 ka mga foodcart vendors unom kanila ang wala nagsunod sa gimando nga gidak-on sa sako nga sudlanan sa ilang basura ug misaad kini nga mosunod sa patakaran.

 

 

Alayon niini mapasalamaton si kanhi Kag. Enrico Salcedo, chairman sa Night Market Team sa mga vendors nga nagsunod sa maong gabayan ug naglaum nga ma-sustain ang kalimpyo diha sa ilang pagpamaligya.

“Kay sama sa giingon ni Mayor Klarex nga aduna usab kamoy mga pangandoy sa kinabuhi busa tabangi ninyo ang gobyerno kay tabangan usab kamo sa gobyerno,” dugang ni Salcedo.

 

Gikalipay ni Mayor Klarex ang kahapsay ug kalimpyo karon sa Cogon Market area ilabina ang kaluag sa dagan sa trapiko, gani gidayeg niya ang mga kadagkuan sa Night Market Team uban ang kapulisan sa ilang maayo nga pagdumala.

 

Samtang gikonsiderar usab ni Kag. Salcedo ang hangyo sa mga vendors nga tugotan sila nga makasugod na og baligya sa 5:30 sa hapon imbes nga 6:00 sa hapon. Apan ang maong hangyo tukion pa sa sunod nga panagtigom sa committee kung tugotan ba o dili. (ALR/CIO/Photos by Reynan Baylin/CIO)