GIANUNSYO ni Mayor Rolando “Klarex” Uy nga buksan na ang Cagayan de Oro City College karong Septiyembre 2023 alang sa pipila ka mga kurso nga mas haom alang sa mga nanginahanglan og libre’ng edukasyon ning syudad.

 

Matud ni Mayor Klarex, atol sa iyang programa sa radyo nga ‘Inyong Alagad, Mayor Klarex’ iyang gipahibalo usab nga gisusi na sa City Engineering Office kauban ang Office of Building Official ang luna sa Brgy Dansolihon nga maoy himuong school campus sa city college nga gidonar sa mga indigenous people sa maong dapit.

 

Gipasabot ni Mayor Klarex nga unang tutokan ang kurso sa agrikultura sanglit dako ang ikatabang niini sa gilantaw nga populasyon sa umaabot nga mga estudyante ug gipahimutang kini sa Brgy Dansolihon tungod kay dili usab buot sa mayor nga maapektohan ug mahimong kompetensya ang city college sa ubang pribado ug publikong kolehiyo ug unibersidad ning syudad. (ACM/ Photo by JOMAR FIGURACION/CIO)