Mikabat na sa 14,616 ka mga patigayon ning dakbayan sa Cagayan de Oro ang nagpa-renew na sa ilang business permit sukad Enero 27, 2023.

 

Sumala pa sa Business Permits and Licensing Office ubos ni BPLO head Jason Adaza nga misaka og 40 porsiyento ang gidaghanon sa nagparehistro sa negosyo, kung itandi sa susamang panahon sa miaging tuig nga anaa lamang sa 10,231.

 

Sa maong gidaghanon, 969 niini ang nagpa-renew sa ilang business permit pinaagi sa online processing nga gitanyag sa syudad.

 

Samtang subay usab sa datos sa BPLO, ang ihap sa mga patigayon nga hingpit nang naka-renew sa ilang business permit gilangkoban sa 2,880 ka mga retailers, 2,160 nga nalambigit sa services, 1,906 ka mga sari-sari stores, 948 ka lessors, ug anaa sa 311 ang general merchandise.

 

Gilauman sa maong buhatan nga mokabat sa kapin 20,000 mil ka mga establisemento ang magpa-renew sa ilang mga negosyo karong tuiga, sanglit kutob lang karong Pebrero 28 ang katapusang adlaw sa ‘extended deadline’ sa paglukat og business permit ning dakbayan. (GB/CIO)