Malampuson nga natapos sa 13 ka mga kliyente sa ‘plea bargaining’ ang unom ka bulan nga Community-Based Drug Rehabilitation Program (CBDRP) sa syudad ubos sa City Anti-Drug Abuse Council (CADAC) nga gipangulohan ni Mayor Rolando `Klarex’ Uy pinaagi sa Oro Citizen’s Wellness & Development Center (OCWDC) sa Office for Community Affairs.

 

Sa iyang mensahe, gidasig ni City Councilor Romeo Calizo, co-chairman sa CADAC ang mga clients nga hingpit na nga biyaan ang gidiling druga kay dili kini maayo sa ilang kinabuhi.

 

“Likay kita paggamit, pagbaligya ug paglambigit sa gidiling druga,” matud ni Kag. Calizo atol sa commencement exercise nga gipahigayon bag-ohay lamang sa Patrick Cronin Hall, St. Augustine Cathedral.

Si OCWDC Officer-in-Charge Cheryl De la Cruz naglaum nga dili malimtan sa mga kliyente ang ilang natun-an sa programa sulod sa unom ka bulan nga pagtambong.

 

Gipasabot usab ni Office for Community Affairs head Oliver Egypto nga anaa kanunay ang gobyerno sa syudad pinangulohan ni Mayor Klarex nga motabang ug moalalay kanila uban sa kanunay nga suporta sa USAID. (ALR/CIO/Photos by Reynan Baylin/CIO)