Friday, 03 February 2023 08:34

KOLEKSYON SA BUHIS MISAKA OG 36%; PINAKATAAS SULOD SA 5 KA TUIG

Written by
Misaka ang koleksyon sa buhis sa dakbayan sa Cagayan de Oro og 36 porsiyento sulod sa bulan sa Enero ning tuig.
 
Gitaho ni City Treasurer Jasmin Maagad nga mikolekta ang dakbayan og P704 milyones sa miaging bulan, mas taas og P185 milyones kung itandi sa P519 milyones nga koleksyon sa susamang bulan sa miaging tuig.
 
Tungod niini, mipadayag sa iyang dakong pasalamat si City Mayor Rolando “Klarex” Uy sa suporta sa business sector, ilabina sa economic recovery program sa iyang administrasyon.
 
“Salamat sa atong mga negosyante sa inyong suporta sa atong mga paningkamot nga mahibalik ang kalig-on sa atong ekonomiya,” pamahayag ni Mayor Klarex.
 
Gitumbok ni Maagad nga ang ‘fiscal incentives package’ ni Mayor Klarex maoy nakapa-aghat sa mga negosyante sa pagbayad sa ilang mga buluhisan, hinungdan nga misaka usab ang business tax collection sa syudad.
 
Lakip sa gihatag nga incentives mao ang 20% discount sa mga negosyante nga magbayad og ‘advanced’ sa ilang real estate tax ug ang pagwagtang sa multa sa mga delingkwenteng magbubuhis.
 
Sa tuyo nga mahatagan sa kasayon ang mga negosyante, nagpahimutang ang syudad og Business-One-Stop-Shop diha sa barangay hall sa Puerto ug SM Uptown aron ma-akomodar kadtong magpa-renew sa ilang mga business permits ug uban pang transaksyon, sanglit giuswag usab ang deadline niini gikan Enero 20 ngadto na sa Pebrero 28 ning tuig. (IAF-CIO)