Usa ka Memorandum of Agreement ang gilagdaan tali sa kagamhanang lokal ning syudad ug Philippine Business for Education (PBed) uban sa pag-abag sa Citi Foundation alayon sa pagpatuman sa JobsNext training program, Pebrero 9 sa may Dynasty Court Hotel ning syudad.

 

Tinguha sa JobsNext program nga matabangan ang mga kabatan-onan nga mapalambo ang ilang kahibalo kalabot sa mga bag-ong teknolohiya pinaagi sa libreng pagbansay, pasabot ni Justine Raagas, ang Kagayanong Executive Director sa PBed.

 

Sa iyang mensahe, nagpasalamat og dako si Mayor Rolando "Klarex" Uy sa hugot nga suporta sa PBed ug Citi Foundation, ug mipasalig nga anaa kanunay magpaluyo ang syudad aron mabansay ug mabaid ang kahibalo sa mga kabatan-onan kalabot sa bag-ong teknolohiya nga maoy kasagaran gikinahanglan karon sa pagpanarbaho.

 

Nasayran nga anaa sa 100 ka kabatan-onan ang mipailawom karon sa pagbansay aron mamahimong business analyst, data scientist, o JavaScript developer.

Usa ang dakbayan sa Cagayan de Oro nga napili isip pilot LGU sa PBED alang sa maong programa. (GB/photos by Kim Zaldivar of CIO)