Sa tinguha nga mahatagan og dugang kinitaan ang mga sidewalk vendors sa Cogon Market, magpahigayon og tulo ka adlaw nga kalingawan si Mayor Rolando Klarex’ Uy karong Valentine’s Day nga giulohan og ‘Love, Music & Dine’ Valentine Night Market Activity’.

 

Sa regular meeting sa Night Market Management Committee, gipadayag ni acting City Tourism Officer Rico Libre ngadto sa team nga ang kalingawan magsugod karong Pebrero 13-15, 2023, matag 6:00 sa gabii hangtud 11:00 sa gabii, diha sa dalan Guillermo diin anaa nahimutang ang mga foodcart sa kwek-kwek, balut, proben ug uban pa.

 

Nasayran nga motukar ang banda sa city hall nga modalit og mga awit alang sa katawhan ug suki sa mga foodcart vendors nga mopalit ug mokaon atol sa maong mga adlaw.

 

Nunot niini, adunay pagsira sa pipila ka mga dalan ug ginagmay nga kausaban alang sa maong kalihokan ug sa samang higayon mahatagan og seguridad ang publiko nga mosuroy sa maong lugar.

Sa maong adlaw, makita nga magsul-ob og kolor pula ang tanang mga sidewalk vendors alayon sa kasaulogan sa Valentine’s Day. (ALR/CIO)