Paglimpyo ug pagtangtang sa mga billboards nga walay business permit ang unang tutukan sa Task Group Demolition basi sa ilang rekomendasyon ngadto sa buhatan ni Mayor Rolando `Klarex’ Uy.

Gipasabot ni TG Demolition Chairman Atty. Jose Edgardo Uy nga sa 63 ka mga billboards ning syudad, wala ra niabot og 10 ang adunay business permit.

 

Samtang gibutyag ni Kag. John Michael Seno, co-chair sa TG Demolition, ang dako nga income sa syudad sa Davao nga mokita og kapin P500 milyones sa signages lamang, kumpara sa Cagayan de Oro nga pila lamang ka milyon ang income sa billboards nga buhis.

 

Kini nga kasayuran ang wala gikalipay ni Mayor Klarex diin adunay pipila ka mga negosyante nga wala nagtuman sa ilang responsibilidad ngadto sa gobyerno, ilabina ang pagbayad sa insaktong buhis.

Nunot niini, giuyonan ni Mayor Klarex ang rekomendasyon sa TG Demolition ug gihatagan og kagahum aron ipatuman ang angay buhaton subay sa balaod.

 

Hinuon, gipadayag ni Atty. Uy nga hulatan nila ang kumpleto nga assessment sa City Legal, OBO, ug City Treasurer sa dili pa magpahigayon og clearing operation. (ALR/CIO/Photos by Kim Zaldivar/CIO)