“Ang usa ka ginikanan nga tinuod naghigugma sa iyang anak , i-iway niya sa kadaot, kalisdanan, ug mga problema, ug paningkamotan niya nga mahisubay sa matul-id ug matarong nga dalan.”

Kini ang giluwatang pamahayag ni Mayor Rolando ‘Klarex’ Uy atol sa iyang pakigpulong sa gatusan ka mga batan-ong ginikanan sa Barangay Agusan kagahapon, Pebrero 13 ning tuig.

 

Nagtuo si Mayor Klarex nga dako ang kaakohan sa mga ginikanan diha sa paghatag gabay sa ilang mga anak aron malikay sa ‘teenage pregnancy’ o’ sayo nga pagmabdos sa 10-19 anyos nga mga bata ug paglambigit sa uban pang daotan nga bisyo.

 

Sigon sa datos sa syudad, padayong gakunhod ang ihap sa insidente sa ‘teenage pregnancy’ gikan tuig 2021 hangtod 2022, busa angayan lamang nga mas pahugtan pa ang kampanya hangtod sa hingpit makab-ot ang tinguha nga wala na gyud kabataan nga sayo ug dili pa andam nga magmabdos.

 

Pinaagi sa Community Improvement Division ug City Health Office, usa sa gipatutukan ni Mayor Klarex ang suliran sa ‘teenage pregnancy’ sa syudad. (AGP/Photos by Reynan Baylin/CIO)