Human nakita nga nalipay ug nalingaw ang katawhan ilabina ang mga night market vendors sa gipahigayon nga tulo ka gabii nga kalingawan alang sa kasaulogan sa Valentines Day diha sa Cogon market area, dako ang posibilidad nga padayonon kini ni Mayor Rolando `Klarex’ Uy.

 

“Kung pinaagi niini magkahiusa kita ug malipay kamo, ipadayon nato kini ug mangita kita og lain nga mga pagsuway,” pamahayag ni Mayor Klarex atol sa iyang pagbisita sa Love, Music & Dine Valentine Night Market Activity.

 

Labaw nga gikalipay ni Mayor Klarex ang kasayuran nga mas nidako ang income sa mga night market vendors tungod sa maong kalihokan nga gidagsa sa mga tawo.

Ang maong kalihokan gipasiugdahan sa City Tourism Office uban sa Night Market Management Committee.

 

Nunot niini, gipasalamatan ni Mayor Klarex ang City Tourism Office, ug tanang buhatan sa city hall ug mga department managers ilabina ang city hall band nga nagtinabangay aron mapahigayon ug magmalampuson ang maong kalingawan.

Lakip sa gipasalamatan sa mayor ang tibuok pwersa sa Cagayan de Oro City Police Office (Cocpo) pinangulohan ni P/Col. Aaron Mandia, ug mga barangay tanods. (ALR/CIO)