MOKABAT na sa 1,044 ka indibidwal ang nakaparehistro sa Philhealth Konsulta Mass Registration kagahapon, Pebrero 16 diha sa Barangay Kauswagan nga gipangunahan sa City Health Insurance Office ug hugot nga suporta sa Philheath Insurance Office X.

 

Sigon sa datos, 493 kanila ang rehistradong miyembro sa Philhealth, samtang 551 usab ang mga ‘dependents’.

 

Nagkadaiyang serbisyo ang gitanyag sa nasangpit nga kalihukan sama sa members enrollment and updating, KonSulTa registration, medical assessment and consultation, ug issuance sa ID cards ug printing sa member data record (MDR).

Muabot sa 374 ang mipailawom sa profiling ug 196 usab ang nakapahimulos sa medical consultation.

 

Gawas sa CHIO, anaa usab ang pipila ka personahe sa City Civil Registry nga mitanyag sa serbisyo sama sa birth registration, ingon man pag-atiman sa mga pangutana kabahin sa correction of errors sa birth certificate ug uban pa.

Ang maong aktibidad alayon sa mandato sa kagamhanang lokal pinangulohan ni Mayor Rolando Klarex Uy nga mapaduol ang serbisyo sa gobyerno ngadto sa katawhan. (AGP/Photos by Roel Felicitas/CIO)