Gihingusgan karon sa administrasyon ni Mayor Rolando `Klarex’ Uy nga maplastar ang alacart section diha sa Cogon market alayon sa laraw niini nga himoong landmark o’ tourist destination sa syudad.

 

Nunot niini, gipatawag sa Night Market Management Committee, pinangulohan sa co-chairman ug kanhi Kag. Enrico Salcedo, ang mga alacart vendors adlaw’ng Martes, Pebrero 21, 2023, diin gisugyot kanila ang posibleng mga gabayan nga gustong ipatuman sa syudad.

 

1) Kinahanglan uniform ang ilang mga stall o’ tent.

2) Mag-uniforme og t-shirt ang mga vendors, ingon man ang ilang mga trabahante.

3) Dili na paagian og mga sakyanan ang ilang area.

4) Magbutang og mga portalets.

5) Dili na itugot ang pagbaligya og ilimnong makahubog.

6) Labaw sa tanan, adunay insakto nga garbage disposal.

 

Gipahibalo usab sila ni Kag. Salcedo nga karong adlaw’ng Sabado butangan ni Mayor Klarex og live band sa city hall ang maong area aron mas modagsang pa ang mga tawo nga mangaon.

Kini nga kalambuan ang gikalipay sa mga alacart vendors ug mahinamon nga naghandum sa adlaw’ng Sabado, hinungdan nga miuyon silang tanan sa mga gabayan nga ipatuman sa syudad.

 

Hinuon, mihangyo ang mga alacart vendors nga sa Marso 4 na sila magsugod og sul-ob sa ilang uniporme.

 

Alayon niini, gipasalamatan sa mga alacart vendors si Mayor Klarex kinsa naningkamot ug naghuna-huna sa ilang kaayohan. (ALR/CIO/Photos by Jay Arancon/CIO)