DAKO’NG kalipay ug pasalamat sa katawhan sa kabarangayan ning syudad ang pagdala sa libreng laboratory check-up sa administrasyon ni Mayor Rolando “Klarex” Uy sa matag pahigayon sa “Klarex nga Serbisyo sa Baryo”.

Lakip sa serbisyo ang X-Ray, ultrasound, blood chemistry laboratory ug ECG.

 

Kini nga mga serbisyo gidumala sa City Health Office ubos sa pagpangulo ni City Health Officer Dr. Rachel Dilla sa tinguha nga mahatagan og de kalidad nga serbisyo sa panglawas ang katawhan sa kabarangayan.

Kahinumdoman nga gisugdan ni Mayor Klarex ang maong programa sa pagsugod sa iyang administrasyon sa nilabay’ng tuig tungod kay mahinungdanon kaniya ang pagpaduol sa gobyerno sa katawhan, ilabina niadtong mga anaa sa kabukiran ug niadtong mas nanginahanglan.

 

Ang ‘Klarex nga Serbisyo sa Baryo’ ipahigayon matag Sabado sa tanang barangay sa Cagayan de Oro. (ACM/Photos by ROEL FELICITAS/CIO)