GIPRESENTAR sa City Memorial Park Board ngadto kang Mayor Rolando “Klarex” Uy ang nauyonan nga balayronon sa mga serbisyo nga gihatag sa City Memorial Park ning syudad.

 

Mibisita sa buhatan ni Mayor Klarex si City Councilor Edgar Cabanlas, kinsa nangulo sa City Memorial Park Board, kauban si Engr. Armen Cuenca sa City Local Environment and Natural Resources Office (Clenro) ug Sol Mosqueda.

 

Gipasabot ni Mosqueda, focal person sa City Memorial Park project, nga ang mga balayronon nga gitanyag alang sa funeral services ug uban pang serbisyo “affordable” kon makaya lamang ug gipahaom sa mga ordinaryong molupyo ug dili makagahom sa pribadong memorial services.

 

Matud ni Mosqueda, mahatagan og disenteng kapahulayan ug serbisyo ang mga minahal nga mitaliwan na sa pinakaubos nga balayronon diha sa City Memorial Park diin ikatandi na ang serbisyo niini sa mga pribadong funeral homes.

 

Kahinumdoman nga gibuksan na ni Mayor Klarex ang air conditioned viewing chapels, ingon man commercial spaces palibot sa memorial park ug lakip na gitunol sa mayor ang funeral hearse niadtong Oktubre 2022.

Alang sa mga buot makisayod sa mga serbisyo sa City Memorial Park, mahimong mobisita sa kanhi Bolonsiri cemetery. (ACM/Photos by Kim Zaldivar/CIO)