UPAT ka mga bag-ong ‘Klarex classroom’ projects ubos sa administrasyon ni Mayor Rolando “Klarex” Uy ang gitagana nang ipailawom sa bidding process sa tinguha nga madugangan ug matubag ang padayong pagtaas sa ihap sa mga estudyante ning syudad.

 

Matud ni Mayor Klarex Uy pinasahi ang mga tukoron nga bag-ong classrooms sanglit aduna na kini built-in multi-media package nga naglangkob sa SMART TV, projector, sound system ug desktop computer.

 

Tumong ni Mayor Klarex nga mahatagan og kahamugaway ang mga estudyante lakip mga magtutudlo ug gisiguro gayud niini nga aduna kini functional nga fire alarm system sa panahon nga adunay mga panghitabo.

Dugang sa mayor lakip sa iyang classroom projects ang paghatag og mga lingkoranan sa estudyante, teacher’s table, grills sa mga bintana ug comfort rooms.

 

Kahinumdoman nga una nang gibutyag ni Mayor Klarex nga mokabat sa 86 ka mga classrooms ang iyang tukoron, diin 48 niini sa district 1 ug 38 alang sa district 2, ug duha ka laboratory alang sa East Gusa National High School ug Agusan National High School.

 

Usa sa mga priority agenda ni Mayor Klarex ang pagtutok ug pagpalambo sa edukasyon ning syudad. (ACM/CIO)