Wednesday, 22 March 2023 08:34

CAG. DE ORO, NASAKMIT ANG CROWN AWARD 2022 SA IKADUHANG HIGAYON

Written by
DAKONG garbo sa dakbayan sa Cagayan de Oro pinaagi sa City Nutrition Committee human gipasidunggan ang siyudad isip ‘Consistent Regional Outstanding Winner in Nutrition (CROWN) Award’ atol sa 2022 National Nutrition Awarding Ceremony nga gipahigayon, Marso 20, didto sa Manila Hotel.
 
Nadawat sa siyudad ang certificate of recognition ug cash prize nga balor og P200,000 gikan sa National Nutrition Council.
 
Usa sa rason nga nakab-ot sa syudad ang award mao ang paglambo sa ‘nutritional status’ sa mga kabataan human miubos ang kaso sa ‘stunting’ kon putot, underweight ug malnourished.
Ang City Nutrition Committee hugot nga nagpasalamat sa kusganong suporta ni Mayor Klarex Uy isip chairman sa maong komitiba.
 
Mismo si Committee on Health Chairperson Dra. Malou Gaane, City Health Officer Dr. Rachel Dilla, City Nutrition Action Officer Nenita F. Rabe, City Health Office Consultant Dr. Fe Bongcas ang midawat sa maong award.
Kini na ang ikaduhang tuig nga nasakmit sa siyudad ang maong award nunot sa pag-mintinar sa epektibong implementasyon ug pagdumala sa city nutrition program sukad tuig 2021.
 
Tipik niini mao ang pag-apud-apud sa breastfeeding kits ngadto sa mga nagpasuso nga inahan ug Infant and Young Child Feeding (WCF) counseling cards sa mga peer counselors, ug Urban Container Household Gardening (UCHG). (NLB/CIO/photos courtesy of CNC)