Friday, 31 March 2023 09:01

2 KA SATELLITE OFFICE SA CDRRMD TUKORON SA AGUSAN UG LUMBIA

Written by
SUPORTADO sa City Disaster Risk Reduction and Management Council (CDRRMC) ang pagmugna og duha ka satellite office alang sa CDRMMD-ORO Rescue 911 sa Brgy Agusan ug Lumbia ning syudad human giaprobahan sa mga sakop sa CDRRMC ang usa ka resolusyon atol sa CDRRM 1st Quarter Full Council Meeting adlaw’ng Huwebes, Marso 30, 2023.
 
Tumong sa maong proyekto ang paghatag og “timely response” kon paspas nga pag-responde sa bisan unsang matang sa emerhensiya sa este ug westeng bahin ning syudad.
Kahinumdoman nga nahimutang ang buhatan sa CDRRMD-ORO RESCUE sa sentrong bahin ning syudad ug mahinungdanon ang response time sa mga emerhensiya alang sa kaluwasan sa nanginahanglan ug usa ang distansya ug trapiko sa mga isyu nga angay tutokan.
 
Matud ni Nick Jabagat, hepe sa City Disaster Risk Reduction and Management Department (CDRRMD), nga strategic ang nahimutangan sa Brgy Agusan alang sa esteng bahin, samtang susama usab ang Lumbia nga maoy motubag sa mga medical nga panginahanglanon, ingon man mga posibleng landslides sa kabukiran.
 
Dugang ni Jabagat, adunay ambulansya ug mga personahe sa CDRRMD nga maoy motutok sa satellite offices.
Samtang mipasalig usab ang konseho ning syudad ubos ni Mayor Jocelyn “Bebot” Rodriguez sa suporta sa maong katuyoan. (ACM/CIO)