Gipasidunggan isip kampeon ang Macasandig Barangay Women Development Committee sa 'Thriving Livelihood' contest atol sa 'Gabi ng Parangal,' Marso 30, diha sa City Community Amphitheater, ning siyudad, diin plaque of recognition ug cash prize nga balor P15,000 ang nadawat sa grupo.

 

Nasayran nga ang Macasandig Barangay Women Development Committee nahimong National Awardee sa Department of Interior and Local Government sa ilang best practices sa bakery project niadtong tuig 2012.

Sa kasamtangan, ang grupo aduna nay 300 ka mga miyembro ug nag-operate karon og mini-grocery ug small cooperative nga gatanyag og catering services.

 

Gipasidunggan usab isip 2nd placer ang 'Kabulig sa Kinaiyahan' sa barangay Cugman diin sila midawat og cash prize nga P10,000 ug 3rd place ang Balubal Seri Farmers Association og cash prize nga P5,000 ug plaque of recognition.

Ang 'Thriving Livelihood' contest gipangulohan sa City Gender and Development Focal Point System isip pag-ila sa mga grupo sa kababayen-an sa nagkadaiyang barangay kansang panginabuhian ang nakadasig sa pagtinabangay sa ilang komyunidad. (NLB/CIO/photos by Kim Zaldivar)