Hingpit nang gisilyuhan kagabii, Abril 13 ang pagtambayayong tali sa kagamhanan sa Cagayan de Oro, Department of Science and Technology (DOST) ug University of Science and Technology of Southern Philippines kon USTP pinaagi sa pagpirmahay sa usa ka Memorandum of Understanding (MOU) nga nagtinguha nga mamahimong ‘Smart and Sustainable City and Community’ ang dakbayan.

 

Ang MOU gilagdaan mismo ni City Mayor Rolando 'Klarex' Uy, DOST Undersecretary for Regional Operations Engr. Sancho A. Mabborang ug USTP President Dr. Ambrosio Cultura II.

 

Gikalipay ni Usec. Mabborang ang maong partnership tali sa ilang buhatan ug gipasalig sa maong opisyal nga andam ang DOST pag-abag sa mga programa sa dakbayan, ilabina ang pagpa-uswag sa kalidad sa kinabuhi sa katawhan ug sa natad sa pang-gobyerno pinaagi sa mga bag-ong teknolohiya.

 

Samtang, dako usab ang pasalamat ni Mayor Klarex Uy sa tanyag sa DOST ug USTP sa pag-abag sa mga programa sa syudad, sanglit prayoridad sa iyang adminsitrasyon nga mapadali gayud ang paghatag og batakang serbisyo ngadto sa katawhan, ug dakong tabang niini ang bag-ong teknolohiya.

 

Si USTP President Dr. Cultura nagkanayon nga dili na bag-o kanila ang partnership tali sa dakbayan tungod kay dugay nang nakigtambayayong ang unibersidad sa mga programa sa syudad.

 

Ang ‘Smart and Sustainable City and Community’ program sa DOST usa ka long-term program sa maong ahensya, uban ang mga partner agencies, aron mapakusgan ang paggamit sa ‘digital technology and innovations’ alang sa pagpa-uswag sa paghatud sa serbisyo sa gobyerno, pagpalig-on sa ekonomiya, ug pagpa-uswag sa kalidad sa kinabuhi sa katawhan.

 

Nasayran nga pipila pa lamang ka mga LGUs dinhi sa Mindanao ang nahimong benepisyaryo sa maong programa, ug usa na niini ang dakbayan sa Cagayan de Oro.

 

Lakip sa misaksi sa MOU signing sila si DOST-10 Regional Director Engr. Romela Ratilla, Cagayan de Oro Smart City focal person Dr. Ferdinand Miranda, Oro TIPC Head John W. Asuncion, City Mayor Chief of Staff Sheila Lumbatan, ug City Information Officer Ivy Guantero ug uban pa. (GB/Photos by Kim Zaldivar/CIO)