Ang pagatukoron nga bag-ong Operation Kahusay ug Kalinaw center magsilbing dangpanan sa mga katawhan sa dakbayan sa Cagayan de Oro nga nanginahanglan og tabang gikan sa city hall.

Kini ang mensahe ni Mayor Rolando ‘Klarex’ Uy human gipangulohan ang capsule laying ceremony adlaw’ng Huwebes, Abril 20 sa pagpabarog sa usa ka resilience center diha sa may Magsaysay Park, Divisoria ning syudad nga tawagon og Operation Kahusay ug Kalinaw (OKK) resilience center.

 

Matud pa ni Mayor Klarex nga gusto niining ibalik ang OKK center kaniadto nga nahimong sentro sa paghatag og seguridad sa katawhan sa dakbayan, ilabina nga nahimutang kini sa sentro sa Divisoria, diin asa nagsumikad ang ekonomikanhong pag-uswag sa Cagayan de Oro.

 

Ang pagtukod sa OKK center tipik sa Phase 1 sa redevelopment project sa tibook Divisoria ubos sa ‘Project Lunhaw’, diin plano sa syudad ug UN Habitat nga usabon ang panagway sa Divisoria isip usa ka ‘walkable ug bikable’ heritage park, apan ipabilin ang ‘historical value’ niini.

 

Sigun pa ni City Engineer Jenito Asequia nga lima ka buhatan sa city hall ang ipahimutang sa maong one-storey building, ug kini mao ang Cagayan de Oro City Police Office (COCPO), City Disaster Risk Reduction and Management Department (CDRRMD), Bureau of Fire Protection (BFP), City Social Welfare and Development Office (CSWDO) ug Roads and Traffic Administration (RTA).

 

Gilaumang mahuman ang one-storey building sa OKK center karong bulan sa Hunyo ning tuig, dugtong pa ni Asequia.

 

Misaksi usab sa kalihukan si Bise Mayor Jocelyn ‘Bebot’ Rodriguez ug mga sakop sa 20th City Council ug mga department managers sa city hall. (CIO/photos by Kim Zaldivar)