Magpahigayon ang kagamhanan sa Cagayan de Oro pinaagi sa City Health Office og usa ka supplemental vaccination kontra tipdas, tipdas hangin ug polio alang sa mga kabataan karong tibuok bulan sa Mayo ning tuig.

Alayon niini, kusganong naghangyo si Mayor Rolando 'Klarex' Uy sa mga ginikanan nga suportahan ang kalihukan ug pabakunahan ang ilang mga anak aron makaangkon og igong proteksyon sa maong mga sakit.

 

Nasayran gikan ni Dr. Ina Grace Chiu, Medical Coordinator sa National Immunization Program ning syudad nga mokabat sa 73,382 ka mga gagmay’ng kabataan ang target bakunahan sa maong supplemental vaccination.

 

Gibutyag ni Dr. Chiu nga bukas ang mga brgy health centers alang sa maong kalihukan, samtang mobisita usab sa mga balay-balay ang mga kawani sa City Health Office ug mga lumilihok sa kabarangayan, lakip ang pagplastar sa mga fixed sites nga mamahimong duolan sa mga ginikanan.

 

Dugang pa ni Dr. Chiu nga mahinungdanon kaayo ang pagpabakuna sa mga kabataan aron malikayan ug maprotektahan batok sa maong mga sakit.

Nagkanayon si Reagan Abu, Health Education Promotions Officer lV sa CHO nga ang ‘Measles, Rubella, Oral Polio Vaccine Supplemental Immunization Activity' (MR OPV SIA) alayon sa pagsanong ug pagsuporta sa kagamhanan ning syudad sa programa sa nasudnong kagamhanan.

 

Gitagana sa Department of Health ang tibuok bulan sa Mayo alang sa ‘Measles, Rubella, Oral Polio Vaccine Supplemental Immunization Activity' (MR OPV SIA) sa tibouk nasud, gawas pa usab kini sa routine immunization program sa mga kabarangayan. (GB-CIO)