Sa tinguha nga magpabilin ang kalimpyo sa river boulevard, gihingusgan sa syudad ubos sa administrasyon ni Mayor Rolando `Klarex’ Uy pinaagi sa ad hoc Technical Working Group (TWG) sa Task Group Demolition nga ipatuman ang mga gabayan.

 

Sa ulahing panagtigom sa TWG nga gidumala ni Atty. Jose Edgardo Uy, nasayran nga sa dili madugay ma-finalized na ang maong gabayan.

 

Pero sa kasamtangan, mga pedestrians, bisikleta ug e-bikes lamang ang gitugutan nga makasulod sa river boulevard.

Samtang gidid-an ang kalihokan sa skateboards ug roller skates.

 

Hangtod adunay panugot, gidid-an nga mosulod ang mga motor vehicles ug motorsiklo gawas lang sa mga emergency vehicles sama sa police cars, ambulansya, ug light fire trucks.

Gidili usab ang pagpamaligya ug pagpanuroy sa bisan unsang matang sa pagkaon, ug mga alcoholic beverages.

 

Samtang gidili ang paglabay og mga sagbot o basura, sanglit magbutang ang syudad og trash bins sa boulevard ug adunay magbantay aron masiguro nga magpabilin ug mamintinar ang integridad, kalimpyo ug kaanyag sa boulevard.

Alayon niini, gihangyo ni Mayor Klarex nga i-tratar ang boulevard isip ‘landmark’ sa syudad nga ikapasigarbo natong mga Kagay-anon. (ALR/Kim Zaldivar/Photos from TWG)