Monday, 29 May 2023 06:17

FEASIBILITY STUDY SA CITY COLLEGE GIPRESENTAR KANG MAYOR KLAREX

Written by
NAKIGTAGBO karong buntag kang Mayor Rolando “Klarex” Uy ang mga sakop sa technical working group aron pagpresentar sa resulta sa feasibility study alang sa tukoro’ng city college sa Brgy Dansolihon ning syudad.
 
Mismo si Dr. Alicia Anghay, kinsa mao usab ang executive director sa Local School Board, kauban si Ms. Maria Victoria Trinidad, ang Vocational School Administrator sa Cagayan de Oro Technical Vocational Institute (CDO TVI), ug Ms. Roxanne Jul Tandang nga sakop sa TWG, ang mipasabot kang Mayor Klarex sa ilang study human nila personal nga nasuta ang school site mismo sa milabay’ng semana.
 
Gipakita sa TWG team ang mga angay sugdan sa maong proyekto sama sa land preparation ug pagsemento sa kadalanan aron mahatagan og kasayon ang mga estudyante ug mga magtutudlo kun ugaling masugdan na ang city college.
Lakip sa mipresentar sa plano si Karl Hein Pios nga gikan usab sa CDO TVI.
 
Kahinumdoman nga midonar og 60 ka ektaryang luna ang tribal community sa Brgy Dansolihon aron maoy tukoran sa damgo nga city college ni Mayor Klarex. (ACM/Photos by Kim Zaldivar/CIO)