Thursday, 25 May 2023 06:24

SWISS NATIONAL NAHIBALIK SA CAGAYAN DE ORO HUMAN SA 2 KA TUIG NGA ‘WALK FOR A CAUSE’

Written by
DAKONG garbo ug kalipay ni Mayor Rolando ‘Klarex’ Uy ang paghidangat sa iyang buhatan ni Mr. Thomas Kellenberger, ang co-founder sa Philippine Island Kids International Foundation, Inc., (PIKIFI), kauban si Celine Furst, ang Deputy Head of Mission sa Embassy of Switzerland in the Philippines.
 
Si Kellenberger miabot sa Cagayan de Oro adlaw’ng Huwebes, Mayo 25 human sa duha ka tuig nga ‘walk-for-a-cause’ nga gibansagan og ‘Kuya Thom Goes Home’ gikan sa nasod Switzerland pauli sa Cagayan de Oro.
Sumala ni Mayor Klarex, dili lang siya apan daghan pa nga mga higala ug katawhan ang naghinangop ug buot makita pagbalik si ‘Kuya Thom’ gumikan sa talagsaong pagbati niini ngadto sa mga tawo ilabina sa mga kabataan nga nanginahanglan og tabang.
 
Gipasabot sa mayor nga personal niyang nahimamat si Kuya Thom dihang Kapitan pa kini sa barangay Carmen hangtod nga nahimong Kongresista ug karon pa subling nagkita.
Dumduman gisugdan ni Kuya Thom ang pagbaklay niini gikan Switzerland niadtong Agosto 25, 2021 sa tinguha nga mapalapdan ang kampanya aron ma-edukar ang katawhan sa mga isyu mahitungod sa pagprotekta sa katungod sa mga kabataan batok child trafficking, prostitution ug uban pa.
 
Laraw usab niini nga makatigom og pundo alang sa PIKIFI aron mas daghan pa nga kabataan ang matabangan. Ang PIKIFI usa ka charity organization nga nakabasi sa syudad nga nagtinguha makahatag og pagkaon, kapuy-an, proteksyon, ug seguridad ngadto sa mga gi-abuso nga kabataan, gipasagdan, gi-abandona ug nahiagom sa labihang kalisod. (AGP/Photos by Kim Zaldivar/CIO)