April 8, 2020 - Gisugdan sa CdeO City Government ang proseso sa pag-apud-apod og tabang pinansyal nga gikan sa Social Amelioration Program (SAP) para sa mga labing apektado sa padayon nga gipatuman nga community quarantine. Kini ingon ni CSWD Overseer for Food and Non-Food Cluster Michael Christopher Fabello gikan sa gipatigayon nga ika-23 nga press conference alang sa COVID-19.

Gawas sa mga benipesyaryo sa Pantawid Pamilyang Pilipino Program (4Ps), target karun sa siyudad nga malista ang indigent families ug mga negosyante nga naa sa informal sector nga dili 4Ps beneficiaries nga ma-apil sa SAP.

Matod ni Fabello, gitaga-an na sa siyudad og guidelines ang mga barangay sa mga angay nila buhaton para sa pagrehistro og pag-apud sa tabang pinansyal nga gikan sa SAP sa ilahang mga gisakopan.

“Yesterday, sa meeting sa mga punong barangay sa 80 ka barangays, na-explain na sa ila kung unsa ang buhaton. Mag-create og teams ug mag-distribute house to house,”

Giklaro usab niya nga ang ang kantidad nga ihatag sa programa kay igo dugang sa lain pa nga tabang pinansyal nga gikan sa gobyerno aron ang tibuok madawatan kay 6,000 pesos.

“Kung naa na silay ayuda gikan sa DOLE pananglit, nahatagan sila ug 5,000 didto, ang apasunon sa DSWD kung qualified siya sa DSWD list, is only 1,000 pesos.”

Ang SAP kay usa ka tabang pinansyal para sa indigent families ug mga naa sa informal business sector nga namugna ubos sa Republic Act 11469 o Bayanihan To Heal As One Act.