Pagmatuod sa tinguha ning syudad ilabina sa administrasyon ni Mayor Rolando `Klarex’ Uy nga palig-onon ang agrikultura, 15 ka mga mag-uuma ang migradwar sa cacao production & processing bag-ohay lang pinaagi sa Farmers Field School (FFS).

 

Si Agricultural Productivity Operations Office (APOO) Dep’t Manager Engr. Paterno Gonzales namahayag nga ang 15 ka mga farmers nga migradwar naka-kumpleto sa ilang comprehensive training program diin ang graduation ceremony didto gipahigayon sa Midkiwan, Barangay Bayanga.

 

Gipasabot sa APOO nga sa tibuok panahon sa training, gitudloan ang mga mag-uuma sa igong kahibalo, kahanas, ug kumpiyansa nga gikinahanglan sa natad sa cacao production.

 

Dako ang pagsalig sa APOO ilabina sa syudad nga pinaagi sa maong pagbansay ug natun-an sa mga mag-uuma, molambo ug magmalampuson ang cacao production ning syudad.

 

Matud ni Gonzales nga sa kanunay andam ang mga personahi sa APOO nga moabag ug motubag sa mga gikinahanglan ingon man mohatag og mga pagbansay ug pagtudlo sa mga mag-uuma ning syudad. (ALR/CIO/Photos from APOO)