Usa ka ordinansa ang gipalabang sa 20th City Council nga naghatag og panugot kang Mayor Klarex Uy pinaagi sa City Legal Officer nga mo-file og Petition for Intervention sa special civil case nga gi-file sa Cagayan de Oro Water District (COWD) batok sa Metropac Water Investments Corporation (MWIC), Cagayan de Oro Bulk Water, Incorporated (COBI) ug Rio Verde Water Consortium Incorporated, ug sa lain nga special civil case nga gi-file ni kanhi Kagawad Enrico Salcedo ug Dr. Ronnie Waniwan isip mga private citizens batok gihapon sa COBI, COWD ug Rio Verde tungod sa rason nga ang kaso naglambigit man sa ‘public interest’.

 

Ang Ordinance No. 2024-466 giaprobahan sa konseho ning syudad atol sa usa ka special session, adlaw’ng Huwebes, Mayo 16 nga gidumala ni Bise Mayor Jocelyn ‘Bebot’ Rodriguez, diin 14 ka mga konsehal ang pabor, samtang upat mihatag og objection.

 

Sa maong special session, gitudlo usab si Majority Floor Leader Edgar Cabanlas isip representante sa City Council sa pag-obserba sa court hearing.

 

Kahinumduman nga nagpagula og usa ka temporary restraining order batok sa COBI, Rio Verde Water Consortium Inc. ug Metro Pacific Water Investments Corp. o MetroPac si Acting Executive Judge Ana Candida Casiño sa Branch 17 sa Regional Trial Court of Misamis Oriental niadtong Martes, Mayo 14 human giputol sa COBI ang pag-supply sa tubig ngadto sa COWD. (CIO/photos by Alixes Gemao)