MALAMPUSONG gitapos ang libreng reading tutorial sa City Scholarships Office kon gitawag nga ‘Project Pagbasa’ alang sa pipila ka mga estudyante sa elementarya, Mayo 10, diha sa Pagatpat Elementary School, ning siyudad.
Mokabat 150 ka mga estudyante gikan sa Pagatpat Elementary School, West City Central School ug Canitoan Elementary School ang mitapos sa 10 ka semana nga reading tutorial project, diin nagsilbing mga tutors ang mga volunteer city scholars.
Ang ‘Project Pagbasa’ hugot nga gisuportahan sa administrasyon ni Mayor Klarex Uy, Committee on Education Chairperson City Councilor Suzette Magtajas-Daba ug Sangguniang Kabataan Federation President Kenneth John Sacala sa tuyo nga matudloan sa pagbasa ang mga natumbok nga estudyante kinsa adunay kalisdanan o galisod pagbasa.
Ang proyekto una nang gilusad sa panahon sa pandemya isip kaugalingong inisyatiba sa mga city scholars nga molupyo sa barangay Tuburan ning syudad. (NLB/CIO/photos courtesy of CSO)