GISUGDAN na karong adlawa, Hunyo 18 ang City College Admission Test (CCAT) sa City College of Cagayan de Oro alang sa school year 2024-2025 ug hangtud lamang kini ugma’ang adlawa.

 

Sa mensahe ni Dr. Ray Butch D. Mahinay, Associate Vice-President for Academic Affairs City College of Cagayan de Oro, iyang gipahibalo nga nagsugod na ang pagkuha sa CCAT alang niadtong naka pre-register sa milabay’ng semana gamit ang https://bit.ly/citycollegeadmissiontest.

 

Samtang magsugod usab ang enrolment process sa Hulyo 8 alang sa gitanyag niini nga 4-year degree courses sama sa Bachelor of Technical Vocational Teacher Education (BTVTED), Bachelor of Technical Livelihood in Education (BTLED) ug Bachelor of Arts in Communications ug ang klase sugdan sa Agosto ning tuig.

 

Ang City College of Cagayan de Oro usa sa mga flagship programs sa administrasyon ni Mayor Rolando “Klarex” Uy diin maoy tinguha niini nga mapalambo ang kinabuhi sa Kagay-anons ug mahatagan og dekalidad nga edukasyon ang kabatan-onan. (ACM/CIO)