NANUMPA ang bag-ong opisyales sa City Indigenous Peoples Political Structure (City IPS) atubangan ni National Commission on Indigenous Peoples (NCIP) Acting Provincial Officer Engr. Archeibald Remalig, atol sa Indigenous Peoples General Assembly nga gipahigayun, Hunyo 18, diha sa Oro Kalandang Peace Center, Sitio Tambo, Barangay Dansolihon, ning siyudad.

 

Kini gipangulohan ni Datu Roger Edgardo Butlig kon Datu Magagaw ug tribal chieftain gikan sa Barangay Lumbia ug tibuok Tribal chieftain sa City IPS.

 

Nasayrang ang City IPS maong magsilbing dangpanan sa mga yangungo sa 16 ka IP communities diin kini gilangkoban sa mga representrante gikan sa 16 ka IP communities ning siyudad.

 

Gawas niini, gipahigayun usab ang duha ka ritwal diin gilangkoban sa pag-halad sa 7 ka manok ug 1 ka baboy.

 

Ang IPs general assembly ning tuig insiyatiba sa City Social Welfare and Development (CSWD) Department IPs Section pinangulohan ni CSWD IPs Focal Person Nena ‘Bae Rose’ Lumandong uban sa non-government organization nga gitawag og SAMDHANA Institute. Kini gitambongan sa dul-an 150 ka miyembro sa IPs sector ug SAMDHANA Institute representative Bing Mordeno. (NLB/CIO/photos by Reynan Baylin/CIO)