Hugot nga gisuportahan ug gipaluyohan sa administrasyon ni Mayor Klarex Uy ang mga gagmay’ng negosyante nga makapanginabuhi dinhi sa syudad sa Cagayan de Oro.

 

Kini ang gitataw ni Sheila Lumbatan, Chief of Staff ni Mayor Klarex Uy, agi’g reaksyon sa mikaylap nga mga taho sa social media nga matud pa ‘anti-small business’ ang kagamhanang lokal sa Cagayan de Oro.

 

Giklaro ni Lumbatan nga sukwahi sa maong taho, hugtanong gipaluyohan ni Mayor Klarex ang mga gagmay’ng negosyante dinhi sa syudad human gihatagan og higayon nga makapamaligya pinaagi na sa pagpalapad sa Night Market diha sa merkado sa Cogon ug Carmen.

 

Gawas pa niini, ubay-ubay na usab ka grupo sa mga gagmay’ng negosyante ang nakapahimulos sa livelihood assistance grants gikan sa kagamhanan sa syudad, dugang pa ni Lumbatan.

 

Agi’g pamatuod, awardee usab kanunay ang dakbayan sa Cagayan de Oro isip finalist sa ‘Most Business-Friendly City’ award ng gipasiugdahan sa Philippine Chamber of Commerce and Industry (PCCI) matag tuig, dugtong ni Lumbatan.

 

Ang pamahayag gihimo ni Lumbatan human gikonpirmar ni City Councilor Jay Roa Pascual, chairman sa Committee on Tourism sa konseho sa usa ka radio interview nga miatras matud pa ang private organizer sa Higalaay Festival Market nga ipahigayon unta diha sa Rio de Oro Boulevard karong bulan sa Agosto.

 

Sigun pa ni Pascual nga ang maong kalihukan usa unta sa mga parallel events sa Higalaay Festival karong tuiga, apan gisibog kini karong bulan sa Disyembre ning tuig human miani og reaksyon tungod matud pa sa isyu sa rental fee sa matag stalls.

 

Gikasubo ni Pascual ang pagsibog sa maong private organizer, apan wala siya’y mahimo kondili respetohan ang desisyon niini nga moatras.

 

Plano unta sa mga organizers nga himoong pilot ‘high-end’ night market ang Higalaay Festival Market sa Rio de Oro Boulevard, diin makomparar ang kalimpyo ug ka-moderno niini susama didto sa nasud sa Thailand, South Korea ug Japan. (CIO)