SUBAY sa bag-ong nakaplagan nga langub sa Brgy Dansolihon ning syudad, mipagula og giya ug pagpasabot ang City Local Environment and Natural Resources Office (Clenro) kabahin sa pagpreserbar ug pag-atiman niini pinasubay sa nalatid na nga balaod sa nasud ingon man ang pagdili sa pagsulod sa langob.

 

Sa datus nga gipagula sa Clenro, gipasabot niini nga daghang langob ang nahimutang sa dakbayan busa gipasabot sa ilang buhatan nga angayan lamang sundon ang balaodnon niini.

 

Subay sa RA 9147 o nailang “An Act Providing for the Conservation and Protection of Wildlife Resources and their Habitats” nga nagpasabot nga ang langub usa ka lugar o pinuy-anan sa mga wildlife o kalasanon busa kini protektado sa balaod.

 

Nalatid usab sa RA 9072 o “National Caves and Cave Resources Management and Protection Act” kini nagadeklara nga ang mga langub ug ang mga gikan sa langub nga bahandi sa kinaiyahan sa nasud ug kini protektado usab sa balaod.

 

Gani man, nalatid usab sa Section 6, nga ginadili ang pagpahibalo kabahin sa nahimutangan sa langub sulod sa isa (1) ka tuig gikan sa pagkakaplag sa DENR kung asang dapita nahimutang samtang wala pa kini maklasipikar kung pwedi ba bisitahon, para sa turismo o pagatun-an pa sa mga eksperto.

 

Pipila sa mga gidili nga mga buhaton basi sa Section 7 Prohibited Acts mao ang mosunod: pagkuha, pag-angkon, pagbaligya sa mga anaa sa sulod sa langob; pagsugo o pagsuhol og tawo nga maoy mokuha og mga butang sulod sa langob.

 

Ang makalapas sa maong balaodnon makadawat og silot basi sa Section 8 of RA 9072 of 2001ug kini mao ang pagka-priso sulod sa duha (2) ka tuig hangtud sa unom (6) ka tuig o multa nga balor P20,000.00 hangtud sa P500,000.00, o pagasilutan ug multahan depende sa desisyon sa korte.

 

Ang mga nagsugo sa pag-daut o pagkuha niining mga bahandi pagasilotan sa pagka-priso sulod sa unom (6) ka tuig ug isa ka adlaw hangtud sa walo ka tuig o pagamultahan sa kantidad nga P500,000.00 hangtud sa P1,000,000.00 o pagasilotan ug multahan depende sa desisyon sa korte.

 

Alang sa dugang pangutana bisita lamang sa CLENRO o sa CENRO Initao kabahin niining mga butanga.