Laraw nga pagabuksan sa JR Borja General Hospital (JRBGH) ning dakbayan ang usa ka 'Human Milk Bank' sunod bulan, agig suporta sa mga inahan nga nakasinati'g kakulangon sa gatas sa ilang pagpasuso sa ilahang mga anak ilabina sa mga bag-ong panganak.

 

Nasayaran gikan ni Dr. Michael June Perez, acting Chief of Hospital sa JRBGH, nga andam na ang tanang mga kagamitan ug pasilidad nga maka antigo sa pagpreserbar og mga breast milk.

 

Gikatakdang buksan ang labing una ug bag-ong pasilidad sa JRBGH karung umaabot nga Agusto 22 ning tuiga. Gani man, garbo ni Dr Perez nga labing unang hospital sa nasud ang JRBGH nga nakabaton og Human Milk Bank.

 

Dugang pa niini, aduna usab inisyatibo nga maghimo og Local Lactation Support nga labing una dinhi sa dakbayan, agig suporta sa mga inahan nga nagpasuso sa mga kabarangayan nga nakasinati og kalisud sa supply og igong 'breast milk' alang sa ilahang mga anak.

 

Dako usab ang pasalamat ni Dr. Perez sa administrasyon ni Mayor Klarex Uy diin gihatagan gayud niini og pagtagad ang mga kalambuan sa mga tambalanan ning sa Cagayan De Oro. (GB/CIO)