SA tinguha nga mas mapalambo ang serbisyong medical sa JR Borja General Hospital (JRBGH), laraw sa pamunoan niini ubos sa administrasyon ni Mayor Klarex Uy nga buksan ang Department of Surgery sa City Hospital-Tablon aron mas makunhoran usab ang mga modangop sa JRBGH dinhi sa sentrong bahin sa syudad.

 

Matud ni Acting Chief of Hospital Dr. Michael June Perez, nga lakip sa mga plano sa JRBGH ang pagbutang og ambulatory surgery diin dili na angay i-admit ang pasyente nga mopailawom sa simpleng surgery.

 

Apan dugang ni Dr Perez, laraw gihapon nga magdugang og surgery ward sa mismong JRBGH alang usab sa mga pasyente sa sentrong bahin.

 

Kini nga mga lakang aron matabangan usab ang Northern Mindanao Medical Center (NMMC) nga makunhoran ang ilang admission aron sa ingon mas daghan pa usab nga mga pasyente sa rehiyon ang matabangan.

 

Kahinumdoman nga nakuha na sa JRBGH ang Level II accreditation niini nga nagtugot na sa pagdawat og mas kompikado nga mga balatian. (ACM/CIO)