GIHAN-AY na sa kagamhanang lokal sa Cagayan de Oro ubos sa administrasyon ni Mayor Rolando ‘Klarex’ Uy, ang seguridad alayon sa gikatakdang pagbukas sa ‘month-long celebration’ sa Higalaay Festival 2024 agig pagsaulog sa kapistahan ni Sr. San Agustin, ang patron sa Cagayan de Oro.

 

Kini human nakigtabo ang Higalaay Fiesta Committee sa mga representante sa Cagayan de Oro City Police Office (COCPO), Task Force Oro, Bureau of Fire Protection ug Philippine Coast Guard.

 

Ang grand launching sa Higalaay 2024 ipahigayon karong Agosto 2, alas 6:00 sa hapon sa Rio de Oro Boulevard diin adunay mga dinapit nga bisita aron paghatag og lingaw sa katawhan.

 

Lakip gihisgutan sa gipahigayong tigom karong adlawa, Hulyo 29 nga gipangunahan ni City Councilor Jay Roa Pascual, Chairman sa Committee on Tourism sa konseho ug co-chairperson usab sa 2024 City Fiesta Committee ang pag-activate sa Incident Management Team - City Disaster Risk Reduction and Management Department (IMT-CDRRMD) nga pangulohan ni CDRRMD Department Manager Nick Jabagat.

 

Usa sa tahas sa IMT-CDRRMD ang pagsiguro nga han-ay, luwas ug malinawon ang pagpahigayon sa mga nagkadaiyang kalihokan alayon sa city fiesta.

 

Dumduman moabot sa 50 ka mga kalihokan alayon sa kapistahan ang gihan-ay sa syudad ug mga partner organizations. (AGP/Photos by Kim Zaldivar/CIO)