GIKATAKDANG tukion ugmang adlawa, Hulyo 30 sa mga sakop sa Local School Board kon LSB ubos sa pagpangulo ni Mr Klarex Uy ang taho nga matud pa gihimong ‘drug den’ ang usa ka high school nga nahimutang sa may barangay Cugman ning syudad.

 

Gikonpirma ni Dr. Alicia E. Anghay, ang Focal Person on Education ug LSB Head Secretariat, nga ang nahisgutang isyu nalakip na sa agenda sa LSB atol sa tigom niini karong Martes, Hulyo 30, ala-1:30 ang takna sa hapon diha sa City Mayor’s Office conference room.

 

Sa pagsuta sa usa ka sibyahan sa radyo niadtong adlaw’ng Sabado, Hulyo 27, 2024 subay sa pamahayag sa usa ka caretaker, nasayran nga gihimo matud pa nga ‘suyupanan’ sa druga kon ‘drug den’ ug ‘lodging house’ sa mga mag-uyab ang Cugman National High School nga nahimutang sa Upper Zone 9, barangay Cugman ning siyudad.

 

Gawas pa niini, giingong gipangkawat pa usab ang mga kagamitan sa maong tunghaan sama sa mga suga, wiring, circuit breakers, door knobs, water closets, tangke sa tubig, samtang ang mga bintana niini nga jalosies ang nangabuak ug nadamyos matud pa. (CIO)