AGIG pagsaulog sa bulan sa Nutrition, mipahigayon og Urban Container Household Gardening (UCHG) 2.0 Panagtagbo ang City Inter-Agency Committee (CIAC) adlaw’ng Martes, Hulyo 30 sa City Hall mini park, ning siyudad.

 

Atol sa Panagtagbo, adunay pagpamaligya sa mga tanum nga bunga sa UCHG, mga indigay nga gilangkoban sa cooking contest ug healthy toddler.

 

Mismo si Mayor Klarex Uy ang mipaambit sa iyang mensahe diin iyang gidayeg ang kamahinugdanon sa pagtanom sa utanon sa kaugalingong tugkaran ingon man ang padayong pagtaas na karon sa mga presyo sa palaliton sa kamerkadohan.

 

“Nagkinahangalan gyud kita og utan. Salamat kaayo sa inyong talagsaong nga kakugi nga inyong gipakita karon. Unta sa maong pagpakita ninyo bisan tuod naa mo sa kabaranggayan, daghang nagpasalamat, nagdayeg ug nalipay na makapa-awhag usab sa inyong mga kahigalaan, kasilinganan nga madasig sila nga mahimo man diay ilabina karon nga ang mga utan sa kamerkadohan mahal na kaayo. Pwede na diha sa ato tamnon ug makasiguro pa nga wala’y insectide na gi-spray ug gali man dako kaayo ikatabang sa pagmintinar sa atong panglawas mismo usab nagpasalamat ko sa mga barangay officials nga daghan pang ma-aghat nato nga makapahimata sa mga katawhan nga dili usikan ug dili nato pasagdan nga ilabaylabay ang mga ginamit plastic nga botilya nga pwede matamnan na og utan,” saysay ni Mayor Klarex Uy.

 

Lakip sa mga gisalmot sa maong kalihokan ang mga Pantawid Pamilyang Pilipino Program (4Ps) beneficiaries sa barangays 36, Bayanga, Bugo, Carmen, Consolacion, Gusa, Macabalan, Patag ug Tablon.

 

Samtang, mitambong usab sa kalihokan sila si Mayor Klarex Uy, Jann Guillmore Actub, spokesperson ni Mayor Klarex Uy, City Social Welfare and Development Officer Annie Tongson, City Mayor’s Office Consultant Jordan Ian Apat, City Local Environment and Natural Resources Office (CLENRO) Department Manger Engr. Armen Cuenca, City Gender and Development Focal Point System Representative Jocelyn Peñalosa kinsa mirepresentar ni City GAD Focal Person Sheila Lumbatan, Agricultural Productivity Operations Office (APOO) Representative Paterno Gonzales, ug CSWD 4Ps Focal Person Arlene Baja.

 

Ang UCHG 2.0 Panagtagbo programa nga gisalmotan sa 4Ps ning siyudad.

 

Kini naglangkob sa pagpromotar sa pagpananum sa lagutmon sa mismo nilang tugkaran lakip ang tinguha nga ang ilang gitanum ilang mabaligya alang sa ilang panginabuhian.

 

Kini usab alayon sa kausaulogan sa Nutrition month nga ginasaulog matag bulan sa Hulyo.(NLB/CIO/photos by Kim Zaldivar/CIO)