GIPASIDUNGGAN ang mga mananaug sa video campaign challenge nunot sa kasaulogan sa World Day Against Trafficking in Persons, adlaw’ng Martes, Hulyo 30, nga gipahigayon sa SM Uptown Event Center, ning siyudad.

 

Migula isip kampyeon ang Amethyst nga mga estudyante gikan sa City Central School diin nadawat nila ang plaque of recognition ug cash prize nga P20,000; gisundan kini sa Barangay Indahag alang sa 2nd place diin nadawat nila ang plaque of recognition ug cash prize nga P15,000 ug Barangay Lumbia isip 3rd place ug plaque of recognition ug cash prize na P10,000.

 

Samtang, nakuha usab sa Sangguniang Kabataan council sa Barangay Carmen ang Social Media Choice award pinangunahan ni Sangguniang Kabataan Federation President Kenneth Sacala.

 

Mismo ang City Inter-Agency Against Trafficking and Violence Against Women and Their Children (CIACAT-VAWC) nga girepresentahan ni City Health Office (CHO) Health Education and Promotion Unit (HEPU) Medical Coordinator Dr. Lorraine G. Jungco-Nery, CHO HEPU Health Education and Promotions Officer IV Reagan Abbu, Regional Inter-Agency Against Trafficking and Violence Against Women and Their Children (RIACAT-VAWC), Northern Mindanao Police Regional Anti-Cybersecurity Unit (RACU-10) PCol. Lemuel Gonda, Department of Labor and Employment-X Senior Labor and Employment Officer Glenford C. Labial, Regional Prosecutor Atty. Merlyn Uy, Dr. Aimee Grace C. Gemelo, Medical Officer III sa Department of Health (DOH) X Family Health Cluster uban ni City Health Officer Dr. Rachel Dilla ug City Social Welfare and Development Department Officer Annie Tongson ang mitunol sa mga award.

 

Sa laing bahin, mitambong sa kalihokan sila si City Administrator Atty. Roy Hilario Raagas kinsa mirepresentar ni Mayor Klarex Uy.

 

Ang maong video campaign challenge gisalmotan sa nagkadaiyang barangay ug mga tunghaan.

 

Kini inisyatiba sa CIACAT-VAWC nga gilangkoban sa nagkadaiyang buhatan lakip na ang CHO-CDO ug DOH X ug hugot nga gisuportahan sa SM City CDO Uptown. Tumong niini ang pagsugpo sa Human Trafficking.

 

Ang maong kasaulogan nagdala tema’ng "Leave No Child Behind in the Fight Against Human Trafficking."

 

Gawas sa awarding ceremony, gipahigayon usab ang ‘pledge of commitment’ alang sa pagsuporta sa pagsugpo sa Human Trafficking. Anaa usab libreng HIV screening nga gitanyag ang Sustained Health Initiatives of the Philippines (SHIP), Inc. atol sa kalihokan. (NLB/CIO/photos by Roel Felicitas/CIO)