NAKIGTAGBO ang mga kadagkoan sa Supreme Court sa pagpanguna ni Justice Rolando Robert B. Martin sa Court of Appeals kang City Mayor Rolando ‘Klarex’ A. Uy, Agosto 1, 2024 aron hisgutan ang gikatakdang paglusad sa syudad sa ‘Tri-City Special Justice Zone’ nga nakatutok sa ‘anti-online sexual abuse and exploitation of children’ karong umaabot bulan sa Setyembre ning tuig.

 

Ang ‘tri-city justice zone’ gilangkoban sa mga syudad sa Cagayan de Oro, Iligan ug Ozamiz.

 

Kahibaloan nga si Justice Martin mao usab ang vice-chairperson sa Justice Sector Coordinating Council (JSCC) technical working group on processes and capacity building nga nagdumala sa tanang justice zone program sa nasod.

 

Ang JSCC hiniusang paningkamot sa nagkadaiyang justice sector institutions nga naglangkob sa Supreme Court, Department of Justice ug Department of the Interior and Local Government alang sa mas hiniusang estratehiya sa pagresolba sa mga suliran nga may kalambigitan sa justice system sa ang-ang sa lokal. (AGP/Photos by Roel Felicitas/CIO)