Gipangitaan og solusyon sa administrasyon ni Mayor Klarex Uy nga masulbad ang problema sa Cugman National High School Extension Building human migahin ang Local School Board (LSB) og pundo balor P30 milyones aron matubag ang mga kakulangon sa maong tunghaan.

 

Sa iyang mensahe sa pagpakayab sa nasudnong bandila Lunes sa buntag diha sa city hall quadrangle, si Mayor Klarex namahayag nga gipaningkamotan karon sa LSB nga matubag ang mga kakulangon sa tunghaan sa dili pa mahuman ang Disyembre karong tuiga aron magamit na usab kini sa mga estudyante ug magtutudlo.

 

Ang Cugman National High School gi-turnover sa miaging administrasyon niadtong Hunyo 24, 2022, apan wala kini magamit diretso tungod kay wala kini’y kuryente, tubig, mga bangko ug blackboards, ug daghan pang uban.

 

Gawas pa, ang nahisgutang tunghaan walay building permit, hinungdan usab nga walay occupancy permit, busa, gipangitaan og paagi sa administrasyon ni Mayor Klarex nga matubag kini nga mga problema ug kakulangon.

 

Nasayran nga ang pundo nga gigahin gamiton alang sa pagpakutay og linya sa tubig ug kuryente, pagpalit og mga bangko ug blackboards, pagpuli sa mga electrical wirings, toilet bowls, door knobs nga gipangkawat, pagpaayo sa mga guba nga bintana, ug uban pa.

 

Ang isyu sa Cugman National High School natuki atol sa tigom sa Local School Board niadtong Hulyo 30 nga gidumala ni City Schools Division Superintendent Dr. Roy Angelo Gazo, uban ni Kagawad Suzette Magtajas-Daba, ang chairperson sa Committee on Education sa konseho ning syudad. (CIO)