Aron mapauswag ang kalihokan sa ekonomiya sa fisheries sector diha sa barangay level, gipatuman ug gisuportahan sa syudad ubos sa administrasyon ni Mayor Rolando `Klarex’ Uy ang nagkadaiyang aquaculture projects nga nagsentro sa Bangus fish cage project diha sa Barangay Bayabas ug Cugman.

 

Gani man, ang Bantay Dagat sa Barangay Bayabas malampuson nga naka-harvest og bangus nga mokabat sa 229 kilograms, samtang ang Cugman Active Small Fishfolk Association (CASFA) nakatala og talagsaon nga ani sa bangus nga 3,274 kilograms.

 

Gibutyag ni Engr. Paterno Gonzales, head sa Agricultural Productivity Operations Office (APOO) nga ang ani sa duha ka barangay nakuha sulod sa upat ka bulan lamang nga culture period, pagpakita kini sa kaaepektibo sa proyekto.

 

Ang kalampusan sa Bangus Fish Cage Project gumikan usab kini sa paningkamot ug suporta sa mga opisyales sa Barangays Bayabas ug Cugman, pinaagi sa ilang committee on fisheries.

 

Tungod sa positibo nga resulta sa proyekto, ang administrasyon ni Mayor Klarex malaumon nga ang maong proyekto maghatag og dalan alang sa mas malungtarong industriya sa pangisda sa Cagayan de Oro. (ALR/CIO/Photos from APOO)