GIKATAKDANG ilusad sa unang higayon sa dakbayan sa Cagayan de Oro isip opisyal nga kabahin sa Higalaay Festival 2024 ang ‘Higalaay Festival Market’ diha sa portion sa JR Borja entrance padulong Montalvan Street sa Rio de Oro Boulevard karong adlaw’ng Byernes, Agosto 9, 2024 sa alas 6:00 sa gabii.

 

Ang Higalaay Festival Market gipasiugdahan sa mga private organizers ning syudad sa tuyo nga mahatagan og kahigayonan ang mga small and medium enterprises (SMEs) nga makapasundayag ug mapaila ang ilang mga ‘merchandise’ o produkto.

 

Gani man, suportado sa syudad ang pagpahigayon sa Higalaay Festival Market pinasikad sa Executive Order no. 328-2024 ni City Mayor Rolando ‘Klarex’ A. Uy diin nalatid nga ang Higalaay Festival Market ubos sa pagdumala sa Higalaay Festival Technical Working Group ug Rio de Oro Boulevard Management Team.

 

Dugtong niini, malampusong gipahigayon kagahapon Agosto 5, ang ‘merchants’ orientation’ diha sa tourism hall nga gisalmotan sa kapin 50 ka mga SMEs.

 

Atol sa maong orientation hugot nga gipahinumduman ang mga business owners nga motuman sa mga gabayan nga hiniusang gipanday sa Higalaay Festival Market, Higalaay Festival Technical Working Group ug Rio de Oro Boulevard Management Team aron mapabiling luwas ug hapsay alang sa mga vendors, pumapalit ug mga bisita sa pagpahigayon sa festival market nga molungtad sugod Agosto 9 – 31 ning tuig.

 

Mitambong usab sa orientation si City Councilor Jay Roa Pascual, 2024 City Fiesta Committee co-chairperson, Atty. Jose Edgardo Uy sa Rio de Oro Boulevard Management Team, Ms. Xcyclyn Faith Lumbatan, officer-in-charge sa Human Resource Management Department, Acting City Tourism Officer Mr. Mark Kenneth Jalapadan ug mga opisyal sa City Health Office, Cagayan de Oro City Police Office ug Bureau of Fire Protection.

 

Alang sa dugang impormasyon kabahin sa ‘slots’ ug mga charges mahimong direktang magpadala og mensahe sa mga organizers pinaagi sa facebook page @Higalaay Festival Market o mag-email sa This email address is being protected from spambots. You need JavaScript enabled to view it. (AGP/Photos by Kim Zaldivar/CIO)