DAKONG kahigayonan na usab ang gitanyag sa City College of Cagayan de Oro (CCCDO) ug Pilipinas Shell Foundation, Inc alang sa 38 ka mga Kagay-anons human kini milagda og Memorandum of Agreement alang sa scholarship program.

 

Ang maong kasabutan nagsilbing ‘partnership’ sa City College of Cagayan de Oro ug Shell Foundation sa pagpatuman sa programang Sanayan sa Kakayahang Industriya (SKIL) alang sa tuig 2024-2026 nga nagtumong sa paghatag og libre’ng skills training ug kahigayonan nga makatrabaho.

 

Ang 38 ka benepisyaryo sa maong programa nagikan sa Brgy Puntod ug Macabalan nga maoy host community sa Pilipinas Shell.

 

Ang kasabutan o MOA nahimong mabungahon pinaagi sa paningkamot sa Linkages and Partnerships Office sa city college sa pagpangulo ni Mr. John Patrick Santos.

 

Misaksi sa maong kasabutan si Vice Mayor Jocelyn “Bebot” Rodriguez, City Councilor Suzette Magtajas-Daba, Mr Sebastian c. Quiniones Jr, PESO Manager Ms Kathleen Kate Sorilla, mga kadagkoan sa CCCDO, Pilipinas Shell Foundation personnel ug mga barangay officials sa Brgy Puntod ug Macabalan.

 

Ang maong scholarship naglangkob sa 25 Housekeeping NCII, 12 Shielded Metal Arc and Welding NCI ug 1 SMAW NCII.

 

Lakip sa madawatan sa mga scholars ang ilang identification cards, uniforms, insurance, daily training allowances, SIL/OJT allowances, assessment fees, housekeeping and SMAW consumables ug registration fee alang sa SIL kauban sa COHARA.

 

Subay niini, dako ang pasalamat ni City College interim president Dr. Jestoni P. Babia sa kahigayonan ug partnership sa Pilipinas Shell alang sa mas malambuong komunidad ug mga molupyo sa syudad. (ACM/CIO Photos by ROEL FELICITAS)