GIBUKSAN ning adlawa, Agosto 12, ang ikatulong hugna sa ‘Kahigayonan 2024: UY!portunidad para sa Kabatan-onan ‘Skills Training Expo & Job Fair’, diha sa Centrio Ayala Mall, ning siyudad.

 

Ang maong kalihokan gitanyag alang sa mga kabatan-onan nga nag-edad og 18-30 anyos ilabina alang sa mga Out-of-School youth (OSY) ug mga wala’y trabaho.

 

Kini molungtad hangtud Agosto 14 diin masinati ang skills exhibit and training application, livelihood and entrepreneurship assistance scholarship orientation, UY talks kon inspirational talks ug World Cafe of Opportunities.

 

Gawas niini, ipahigayon ang usa ka adlaw nga job fair ugma’ng adlawa, Agosto 13 sa 3rd floor sa Centrio Ayala mall ug variety show kon ‘dance contest’ nga gisalmotan usab sa mga kabatan-onan.

 

Mismo si Oro Youth Development Officer Lord Saver ‘Vhaugne’ Centina uban ni City Councilor Jay Roa-Pascual kinsa mirepresentar ni Mayor Klarex Uy, Committee on Education Chairperson City Councilor Suzette Magtajas-Daba, Technical Education And Skills Development Authority (TESDA) Regional Director Rafael Abrogar II, City Education and Development Department (CEDD) Department Manager Petalcurin-Dahay, mga miyembro sa Out-of-School Youth Development Alliance ug uban pa ang nangulo sa virtual ribbon cutting ceremony.

 

Nasayran nga kini gibuksan nunot sa pagsaulog sa International Youth Day nga gisaulog matag Agosto 12 diin kini aduna’y temang, “From Clicks to Progress: Youth Digital Pathways for Sustainable Development.”

 

Ang maong kalihokan kabahin sa Oro Youth month nga gisaulog matag bulan sa Agosto.

 

Kini gipangulohan sa Oro Youth Development Office, Sangguniang Kabataan Federation- Cagayan de Oro ug OSYDA.

 

Tinguha niini nga mahatagan og higayon ug kahigayonan ang kabatan-onan sa natad sa pagpanarbaho ug scholarships sa technical vocational course.

 

Alang sa interesadong moapil, gikinahanglan magpreregister ani nga link: http://surl.li/tvjpvs samtang magdala usab sa cover letter ug ug Curriculum Vitae (CV) alang adtong mo-apil sa job fair ugmang adlawa. (NLB/CIO/Photos by Kim Zaldivar/CIO)