Sa dili madugay aduna nay wastewater treatment facility ang merkado sa Carmen human gisugdan na pagtrabaho ang maong proyekto ilabina nga usa kini sa mga priority project sa administrasyon ni Mayor Rolando `Klarex’ Uy.

 

Si Sean Molig, acting dep’t head sa City Economic Enterprise and Business Development Administration (CEEBDA) namahayag nga dako ang iyang pasalamat kang Mayor Klarex sa padayon nga pagsuporta ug paghatag og sulbad sa mga problema sa kamerkaduhan ning syudad.

 

Samtang wala usab pasagdi sa CEEBDA ang mokabat 50 ka mga mamaligyaay nga naapektuhan tungod sa pagtrabaho sa maong proyekto diin temporary silang gi-relocate sa mga bakanteng stall aron dili maundang ang ilang panginabuhi.

 

Mipaabot sa ilang pasalamat ang mga vendors ngadto sa mga kadagkuan sa CEEBDA nga giplastar sila ug labaw sa tanan kang Mayor Klarex nga padayon nga nag-atiman ug naghunahuna sa ilang kaayuhan.

 

Ang proyekto nga nagkantidad sa P26.9-M gilauman nga mahuman sulod sa 207 ka mga adlaw. (ALR/CIO/Photos from CEEBDA)