IPASUNDAYAG sa 80 ka barangay sa Cagayan de Oro ugmang adlawa, Biyernes, Agosto 16 ang kahanas, abilidad, diskarte ug teamwork sa pagdula sa mga tradisyunal nga ‘Larong Pinoy’ atol sa ipahigayon nga ‘Fiesta sa Baryo’ diha sa Misamis Oriental Integrated Sports Complex.

 

Ang ‘Fiesta sa Baryo’ usa sa nakahan-ay nga core events alang sa Higalaay Festival 2024 agi’g pagtamod sa kapistahan ni Senyor San Agustin, ang mahal nga patron sa dakbayan sa Cagayan de Oro.

 

Laraw ni Mayor Rolando ‘Klarex’ Uy nga mabati sa katawhan sa matag barangay ang kasadya ug kabibo sa kapistahan pinaagi sa pagsalmot sa ‘Larong Pinoy’.

 

Ang nasangpit nga mga dula naglangkob sa patintero, kadang-kadang, shatong, dakop biik, palo sebo, dodge ball, tug of war, flour blowing, tumbang preso, tumbang braso ug sack race.

 

Gawas sa mga dula, magpasikatay usab ang matag barangay sa chant competition ug boodle set-up. (AGP/CIO)