Friday, 16 August 2024 01:15

‘PANAGHIUSA SA MATAG BARANGAY MAHINUNGDANON’- MAYOR KLAREX UY

Written by AGP
MENSAHE sa panaghiusa sa matag barangay ug sa tibuok dakbayan ang giluwatan ni City Mayor Rolando ‘Klarex’ Uy atol sa pagbukas sa ‘Fiesta sa Baryo: Larong Pinoy’ karong adlawa, Agosto 16, 2024 diha sa Misamis Oriental Integrated Sports Complex.
 
Mapasalamaton usab si Mayor Klarex sa pagduyog ni 2nd District Congressman Rufus Rodriguez sa maong kalihokan kung diin magtigi ang 80 ka barangay sa 11 ka mga nakahan-ay nga mga ‘Larong Pinoy’, chant competition ug boodle set-up.
 
Matud ni Mayor Klarex nga labaw pa sa premyo nga madawatan sa mananaog ang kabililhon nga makita nga malipayon, mabulokon ug masadya ang pagsaulog sa kapistahan ni Senyor San Agustin nga adunay panag-uban ug panaghiusa sa katawhan.
 
Hugot ang pagtuo ni Mayor Klarex nga dili magmalampuson ang mga kalihukan kung wala ang dakong suporta sa matag barangay ug tibuok katawhan sanglit ‘One Kagay-an, kauban ang Katawhan’. (AGP/Photos by Kim Zaldivar/CIO)