Ubay-ubay ka grupo sa mga farmers gikan sa hinterland barangays ang nahatagan og kahigayonan nga makasalmot sa Fiesta sa Kaumahan Agro-Fair and Garden Show diha Gaston Park atol sa pagbukas niini nga gipangulohan ni Mayor Rolando `Klarex’ Uy, Biyernes Agosto 16.

 

Lakip sa misalmot ang Rural Improvement Club (RIC) gikan sa unom ka mga barangay ingon man 30 ka mga private gardeners ug exhibitors.

 

Nagkadaiyang mga produkto sa kaumahan, ornamental plants, ug uban pa ang makita ug mapalit sa barato lamang nga presyo.

 

Sa iyang mensahi, gihatagan og kalipay ni Mayor Klarex ang mga mag-uuma human iyang gipahibalo nga i-extend ang Fiesta sa Kaumahan hangtod sa Septiyembre ilabina nga nalangan ang pagsugod nga maoy usa sa mga dagkong kalihokan sa Kapistahan ni San Agustin.

 

Tungod niini, gikalipay sa mga mag-uuma ang pamahayag ni Mayor Klarex uban ang dakong pasalamat sa gihatag kanila nga higayon.

 

Samtang gipasalamtan usab ni Mayor Klarex si Regional Executive Director Jose Apollo Pacamalan sa Department of Agriculture (DA-10) nga mitambong sa maong kalihokan sa kanunay nga pagsuporta sa programa sa agrikultura sa syudad aron matabangan ang mga mag-uuma.

 

Mitambong usab sila si City Councilors Jay Roa Pascual, chairman sa Komitiba sa Agrikultura, Suzette Magtajas-Daba, APOO Dept. Manager Engr. Paterno Gonzales, kanhi Nazareth Punong Barangay Jonjon Rodriguez, ug city hall department heads. (ALR/CIO/Photos by Kim Zaldivar, Mark Laurente & Roel Felicitas/CIO)