GIPADAYAG ni City Mayor Rolando ‘Klarex’ Uy ang kamahinungdanon sa edukasyon isip usa sa mga hinagiban sa matag pamilya batok sa kapobrehon.

 

Kini iyang gibutyag atol sa pagsalmot niini sa flag raising ceremony sa Brgy Lumbia karong adlawa, Agosto 19, 2024.

 

“Akong kalipay ug garbo nga matag pamilya adunay nakatapos sa kursong gitinguha”, saysay pa sa Mayor.

 

Sumala ni Mayor Klarex nga pinaagi sa expanded scholarship program sa kagamhanang lokal sa Cagayan de Oro, mahatagan og kahigayonan ang mga kabatan-onan ilabina ang mga kabus nga libreng mokuha sa kursong non-medical, medical ug abogasiya.

 

Gipasabot usab sa mayor nga isip dugay nga nangalagad sa barangay, importante kaniya nga masud-ong ang tinuod nga kahimtang sa katawhan busa nahimugso ang mga programa sama sa Klarex nga Serbisyo sa Baryo, SurUy-SurUy sa Baryo: Klarex nga Serbisyo sa Panlawas ug People’s Day matag adlaw’ng Miyerkules sa city hall.

 

Nagpasalamat usab si Mayor Klarex ni Lumbia Chairperson Alex Toralba ug Lumbia barangay council sa suporta niini matag KSB pinaagi sa pagpang-apod-apod og kasuy seedlings.

 

Gipasalamatan usab niini ang mga barangay nutrition scholars, barangay health workers, barangay tanod ug mga empleyado sa serbisyo nga gihatag sa ilang komunidad.

 

Sa laing bahin, nanghatag usab ang City Social Welfare and Development Office og mokabat 500 ka mga food packs alang sa mga identified beneficiaries sa Brgy Lumbia.

 

Samtang nakadawat usab og birthday cakes ang mga senior citizens sa maong barangay nga nagsaulog sa ilang adlaw’ng natawhan karong bulan sa Agosto. (AGP/Photos by Kim Zaldivar/CIO)